2013年7月13日-今年第三次香港遊

2013年7月13日星期六的早上,
於8點35分出門口,
正式開始今年第三次香港行.
出門口後先去附近銀行撳錢,
跟住再行出去殷皇子馬路站,
於8點45分上了維澳蓮運10B線(編號2061),
9點05分到外港碼頭站落車後就去買船飛,
不過只能買到9點45分的船飛,
買咗船飛後見成朝無食過嘢,
於是就到上面的M記買嘢,
不過真係超貴,
一個豬柳蛋漢堡加支細汽水,
已經要31.50元,
不過無法啦,
鬼叫去碼頭前無去買嘢食咩,
貴到要啦.
之後就上船後,
船到9點55分先開,
11點到達香港.
去到香港後先去西港城的80M睇一睇,
之後就行去坐巴士啦,
在又熱又晒的情況下,
攞住個電話睇住個地圖,
經過文咸東街,
皇后大道中同閣麟街後,
總算行到去擺花街巴士站,
行去到呢度時我已經成身濕哂,
而之所以咁遠行到嚟呢度坐巴士,
係因為一條我本身已經想坐好耐嘅巴士線23A,
將會係7月14日取消,
即係今日就係路線取消前的最後一日服務,
所以當然要把握機會嚟坐啦.
等咗一段時間之後,
於11點50分上了新巴23A線(編號3357),
呢條線真係無令我失望,
因為佢之後會在半山一d又窄又斜嘅街道裡面穿梭,
由擺花街轉上荷李活道,
上亞畢諾道後再轉入堅道再轉上衛城道,
上衛城道呢條路真係好經典,
既窄又斜,
之後轉入西摩道上羅便臣道再落花園道大街,
正常結束這一段非常精彩的半山巴士行程,
但巴士去到銅鑼灣一帶之後塞咗一段好長時間,
最後到12點45分先在勵德邨德全樓站落車,
之後到對面的勵德坊禮賓閣餐廳,
食咗個我覺得都幾貴,
要44元的楊州炒飯做午餐後,
就繼續開始之後的旅程.
食完飯後行去勵德邨總站旁的小路,
經過樓梯行落去蓮花宮,
之後經銅鑼灣道行出去英皇道,
到蘋果商場內的MSD巴模店睇下巴模,
可惜都唔係好啱心水,
部10週年紀念新巴真係好核突,
上色差之餘仲要288元,
真係唔想買.
部2010年虎年富豪B9TL九巴,
覺得個內籠又好似麻麻地,
所以又放低咗.
部波浪色新巴6008,
個內籠又太簡單,
只係為咗個波浪色就要398元我覺得又唔係太抵.
而另一部波浪色新巴1001,
雖然200元係比較抵,
因為80M要賣四百幾,
但我都係覺得個內籠太簡單而無買,
之後有部車身寫上每部舊巴都夢想成為一架新巴的新巴,
只係賣150元我都有d心動,
但最後都係因為內籠太簡單,
外形太似玩具而放棄咗,
所以最後喺msd一部巴模都無買到就走.
離開後我就行去清風街站等巴士,
本來諗住2,10,102同112呢四條線邊條嚟先就上邊部,
點知一行到去站就一口氣走了兩部112,
之後嚟部102同10號又迫到爆,
最後就上了部無咩人嘅新巴2號(編號1037),
坐到去中環(港澳碼頭)總站落車,
再行返去對面西港城的80M,
睇咗一輪之後,
買了部新巴的富豪奧林比安11米2號(編號VA60)模型,
同一隻水杯後就走了.
之後就行番去對面,
先上去7仔買了支6.5元維他檸檬茶後,
就番落去中環(港澳碼頭)總站坐巴士,
點知一行落去就睇到部115號走咗,
心諗有排等啦,
點知行落去企一陣,
好快又有一部嚟啦,
於是就上了這部新巴115線(編號1050),
可皆在港島沿途都塞得好厲害,
特別係去到堅拿道天橋後就塞得更厲害,
連過海底隧道都可以塞車,
最後而出咗紅磡先唔怕塞,
但係喺呢度已經嘥咗我超多時間,
最後到5點先到九龍城碼頭總站落車.
當時計一計數,
我覺得7點前入到龍鼓灘已經無咩機會,
但係我都係要去試一吓,
但可惜在九龍城碼頭等車都等咗唔少時間,
最後等到5點15分左右先上了九巴61X線(編號AV409),
雖然呢程車無咩點塞車,
但係因為車程都好長,
到6點30分先到屯門鐵路站總站落車,
不過一去到站已經睇到部開去龍鼓灘的K52開走咗,
當時心諗就算再等車入到去龍鼓灘應該個天都已經黑哂,
不過我仍然選擇等K52,
之後於6點40分上了鐵巴K52線(編號728),
於7點20分到達龍鼓灘總站,
落車時見仲有少少日落餘暉,
當然就即刻衝出去灘邊度影相啦,
不過當時個天就好靚,
那些僅有的太陽光將天氣映得紅紅的,
不過15分鐘左右就整個天空都變成黑了,
而當時在灘邊映日落的人亦都開始離開了,
我當然亦都走了,
因為既然天黑了,
一個人在這鄉郊地方多少都會有d害怕的,
於是就行番去龍鼓灘總站,
於7點50分上了返鐵巴K52線(編號738),
到8點30分左右在輕鐵屯門市中心站落車,
就行過去對面的商場啦,
在商場裡邊方便吓同上吓網後,
就行落去屯門市中心總站等60X線,
不過見到部排第一的車係之前我搭過嘅車型,
所以我就行番上去商場上多陣網,
之後先再落番去.
到9點07分時上了九巴60X線(編號AVBW46),
於10點左右在佐敦炮台街站落車,
再行過去文成街食嘢,
本來上網見到話呢度一間腸粉鋪的腸粉好味,
所以諗住去幫襯下,
但係見到佢超多人,
唔想等的我就在旁邊一間叫糖水鋪的鋪頭食嘢,
叫咗一個齋腸一碟炒麵同一碗凍芝麻糊,
三樣夾埋一共食咗33蚊,
個齋腸只係6蚊我覺得真係好抵,
但個芝麻糊要14蚊,
相比之下就真係貴咗d,
難怪我見好多人入到嚟都會叫齋腸食,
食完之後見到旁邊腸粉鋪仲多人過頭先,
睇嚟呢間嘢真係幾出名,
不過算啦,
因為當時已經10點幾,
但我仲有行程嘛.
食完之後行番出剛才過馬路那個行人隧道,
但呢條行人隧道四通八達的,
搞到我都喺入面盪失咗路,
好彩最後都總算搵返條啱嘅路出番去.
之後行番出佐敦炮台街站,
於10點55分上了九巴95線(編號ADS156),
到11點30分左右於利康樓站落車,
再行過去順利邨總站,
而在等車前又先去七仔買了支4元的雀巢黑加侖子茶後,
於11點45分上了城巴619線(編號8289),
而我就在巴士上結束了這一天了...
12點時我仍在坐城巴的619,
當時還未過東隧,
之後到12點25分左右,
我才在中環(港澳碼頭)總站落車,
之後買了1點的船飛返澳門,
船到達澳門時已經2點05分了.
落船後即刻過關,
跟住再即刻行出去外港碼頭站,
果然好快就有巴士埋站
於是就上了澳巴N1A線(編號ML-74-85),
到中區/殷皇子馬路站落車再行返屋企,
返到屋企時已經係2點40分左右了,
正式結束一整日的香港行.
而這次香港行的相片我會遲d後補的.